Cada mes, na nosa lareira, acendemos algo máis que o lume: recuperamos o antigo espírito das xuntanzas arredor do lume, onde a música, o canto e a palabra compartida eran parte da vida cotiá. Retomamos esa tradición cunha actividade cultural mensual: un concerto na lareira.

Artistas de distintos estilos e procedencias achegan o seu son a este espazo íntimo e próximo, onde o público non é só espectador, senón parte da experiencia. Un lugar de encontro, conversa e música viva, pensado para gozar en compañía.

Ademais, queremos que non se perdan os saberes das nosas avoas. Por iso organizamos regularmente obradoiros e cursos, onde aprender e poñer en práctica coñecementos tradicionais:

• Elaboración de queixos caseiros
• Creación de xabóns naturais
• Uso e recoñecemento de plantas medicinais
• Bioconstrución
• Obradoiros de pintura, cociña e moito máis